Европска старт-ап недела во СкопјеСкопје, 5 февруари 2016 (МИА) - Идеја и одличен тим се добар пат за креирање на успешна старт-ап приказна, но за остварување на таа приказна потребно е да се поминат повеќе препреки со кои креаторите на бизнисот можат да се сретнат.
Ова денеска беше истакнато во ЕУ Инфо центарот на завршната Конференција за поддршка на македонската старт-ап заедница како дел од глобалниот завршен настан на т.н. Европска старт-ап недела.
Игор Маџов од New Man's Business Accelerator посочи дека токму NMBA е фирма која активно влијае на условите за развивање на „стартапите“ односно на сите кои сакаат да основаат бизнис.
- Се надеваме дека заедно со сите останати коорганизатори ќе имаме можност да влијаеме на старт-ап зедницата да се развива на ниво со кое што ќе можеме да работиме надвор од Македонија, а да ги трошиме парите тука, рече Маџов.
Според него, старт-ап компаниите е потребно да знаат што сакаат, односно да влезат во програма што ќе ги поддржи и постојано ќе ги води кон целта што ќе ја постават.
Секој бизнис и секоја нова идеја е исто како голема компанија, рече Миле Бошков претседател на Бизнис-конфедерцијата на Македонија и додаде дека секој вработен или лидер на компанија треба да ги почитува општествените норми или законски регулативи во насока на еден бизнис.
- Мора да се разговара, да се развива социјалниот дијалог и мора да се почитуваат правилата. Мора пред се бизнисот да стане пасија односно да стане одговорност која ќе придонесе кон подобро општество како и профит на самата компанија, потенцира Бошков.
Социјалните партнери и деловната заедница, според него, мора да се фокусираат на начинот како да им го олеснат бизнисот на стартапите кои се водени од добра идеа и желба. Но, одредбите и деловната клима мора да биде поткрепена од институционален аспект.
Според Јулијана Прчковска извршен директор на проектот „CoSeed“, конференцијата е добра поддршка на стартапите, бидејќи на едно место се собрани сите чинители што се потребни за стартап бизнис.
- По прв пат во Македонија имаме средба на која што старт-ап компаниите се заедно со институциите. До сега тие се разминуваа, бидејќи институциите не сакаа да ги прифатат како посебни видови на правни идентитети, а од друга страна старт-ап компаниите посветени на технологијата и на начинот на работење кој што многу не се прилагодува на правилата, на крај завршуваат со проблеми кога се институциите во прашање, истакна Прчковска.
Поддршка за менторство на конференцијата даде и компанијата Inception Enterprise за оние кои сакаат да започнат бизниси, посебно за дигиталната и ИТ индустријата.
- Ќе понудиме менторство, ќе селектираме лиѓе кои имаат потреба од интернационализација на своите бизниси, а воедно ќе им помогнеме да ги изградат своите бизниси. Ние научивме колку беше тешко и каква помош беше потребна да се изгради еден бизнис, истакна Зоран Настески сопственик на Inception Enterprise.
Свои излагања меѓу другите имаа и претставници на Агенцијата за вработување, Централниот регистар, како и адвокатски друштва кои преку презентации на присутните им ги преставија законските можности за успешен старт-ап бизнис. На конференцијата присуствуваа голем број локални претприемачи и засегнати страни кои во три сесии ги претставија своите искуства.
Настанот е организиран во исто време во над 200 градови во цела Eвропа, а инициран е и директно поддржан од ЕУ.
|