Анѓеловски: Предлогот за одложување на примената на Законот за безбедност во сообраќајот не е утврден од Владата

Скопје, 11 февруари 2016 (МИА) - Предлог-законот за измени и дополнувања на Законот за безбедност во сообраќајот поднесен од страна на министерот за вантрешни работи Оливер Спасовски на 18 јануари до Владата, вчера на владина седница не бил утврден, соопшти на денешниот брифинг портпаролот на МВР Тони Анѓеловски.

Анѓеловски појасни дека по повеќе средби со претставници на автошколите, министерот Спасовски со измените и дополнувањата на законот побарал одлагање на неговата примена за една година.

Инаку, Законот за безбедност на сообраќајот е донесен во септември 2015 година, како дел од усогласувањето на законодавството на РМ, со европското законодавство. Согласно законот, автошколите имаат обврска да инсталираат видео-камери во возилата со кои ќе бидат регистрирани часовите за обука кои ги возат клиентите кои полагаат, но и самите полагања за возачкиот испит. Автошколите имаат обврска и да ги чуваат снимените материјали, а за тоа пак мораат да направат и соодветен софтвер и да имаа опрема за чување.

- Тоа се сериозни финансиски импликации за автошколите, што најверојатно ќе доведе и до покачување на обуката и полагањето односно на целиот процес, изјави портпаролот на МВР Тони Анѓеловски.