Со света литургија одбележан празникот „Три Светители“ во ПрилепПрилеп, 12 февруари 2016 (МИА) - Со свечена литургија во црквата Свето Благовештение во Прилеп, денеска беше одбележан празникот „Свети Три Светители“ посветен на тројцата големи светители: Свети Василиј Велики, Свети Јован Златоуст и Свети Григориј Богослов. Се прославуваше и Денот на бакалите во Прилеп. Со свечената литургија чиноначалствуваше поглаварот на МПЦ, Архиепископот Охридски г.г. Стефан во сослужение со владиците Петар и Климент. Домаќин на прославата на Денот на бакалите беше градоначалникот Марјан Ристески, кој, како што рече, потекнува од бакалско семејство и се чувствува многу горд што се продолжува една голема традиција. - Се чувствувам многу гордо што сум домаќин на овој голем празник за градот Прилеп, посебно за бакалите, кои се значаен дел од локалната економија. На сите прилепчани и на бакалите им посакувам здравје, среќа и да имаат многу повеќе успех и работа во оваа 2016 година, рече Ристески. Идниот домаќин на прославата на оваа децениска традиција во Прилеп, прилепчанецот Емил Шопески, член на прилепската заедница на бакалите, архаично име за трговците, смета дека овој празник во Прилеп и во црквите достојно се прославува. - Нека е честит овој голем празник „Свети Три Светители“ и ми е особена чест што можам да бидам кум идната година“, рече Шопески. За владиката Петар најважно е што овој празник најторжествено и најсвечено се празнува во Прилеп од бакалскиот еснаф. - Еснафот на бакалите празникот го прославуваат со присуство на Боженствената Литургија и со големо присуство на народот во божјиот храм, истакна владиката Петар. Денот на бакалите во Прилеп, на празникот „Три Светители“ се прославува повеќе од четири децении.
|