Амбасадорот Бејли во посета на ДУТ

Тетово, 5 мај 2016 (МИА) - Амбасадорт на САД во Македонија Џес Бејли денеска го посети Државниот универзитет во Тетово каде се сретна со ректорот на ДУТ Вулнет Амети. Ова е прва службена посета на амбасадорот Бејли на ДУТ.

- САД имаат повеќе видови соработка со универзитетите во Македонија како стипендии, студиски патувања и слично директно со американската влада, но, истовремено и со подршка на нашите институции да се поврзат со универзитетите тука. Ова е важен дел од мојата работа во Македонија  да ја засилувам ваквата соработката и со тоа уште повеќе да се зацврстуваат долготрајни врски помеѓу нашите две земји и особено луѓето кои треба уште повеќе да се поврзуваат и да го прошируваат нивното меѓусебно разбирање на себе си и на светот. Вака јас гледам на оваа и другите посети на универзитетите во Македонија, изјави амбасадорот Бејли.

Ректорот на ДУТ Амети, пак, истакна дека студентите, професорите и администрацијата на ДУТ се благодарни на САД за нивниот придонес за оваа институција од почетоците на нејзиното формирање и од, како што рече, нивните заложби за промовирање на демократијата и академските вредности.

- Ние како управа на ДУТ се обидуваме да го унапредиме ова пријателство и да ја зачуваме соработката со американските универзитети преку познати професори од САД кои предаваат на нашите факултети како преку заедничко учество во неколку меѓународни научни проекти во различни полиња, рече Амети.

Во рамките на својата денешна посета на ДУТ амбасадорот на САД Џес Бејли одржа предавање под наслов „Изборите во САД – лични видувања “ по чие завршување одговараше на прашања на присутните студенти и професори од ДУТ.