Шилегов: Имотот ми е од легално пријавени приходиСкопје, 23 мај 2016 (МИА) - Портпаролот на СДСМ Петре Шилегов денеска одговарајќи на новинарски прашања по барањето од пратеникот од ВМРО-ДПМНЕ Андон Чибишев да каже како се стекнал со два стана, рече дека има онолку имот колку што му дозволиле неговите легално пријавени приходи во институциите.
Шилегов на прес-конференција рече дека е горд на адвокатската кариера, функционира на пазарот 22 години и оти може на кој било медиум да го елаборира целокупниот имот, со начинот на којшто го стекнал.
- И од тоа ниту имам намера, ниту сакам, ниту бегам, рече Шилегов, истакнувајќи дека во Македонија законите треба да важат за сите подеднакво.
На прес-конференцијата повторно праша како претседателот на ВМРО-ДПМНЕ Никола Груевски се стекнал со 118.629 евра на своите денарски и девизни сметки за една година.
Прашан дали има некакви разговори за решавање на политичката криза и што смета за иницијативата на ДУИ да се обнови политичкиот дијалог портпаrолот на СДСМ рече дека додека не се поништи аболицијата не може да стане збор за политички дијалог.
- И ДУИ и ВМРО-ДПМНЕ многу брзо во Собранието ќе мораат да се произнесат во однос на прашањето што остана нерешено, а што е сериозен предизивикувач на политичката криза, тоа е аболицијата. Во оваа држава, правото или ќе владее за сите, или нема да владее за никого. Додека не се поништи криминалната аболиција на Горѓе Иванов не може да стане збор за политички дијалог, рече Шилегов.
|