Франгов приреди прием за наградените гимназијалци од Истанбул Гевгелија, 25 мај 2016 (МИА) - Гевгелискиот градоначалник Иван Франгов денеска приреди прием за гимназијалците Кире Џотов и Лазе Раманчев кои од Истанбул се вратија со освоено трето место на Меѓународниот натпревар на истражувачки проекти од природните науки.
Во конкуренција на 579 проекти од 26 земји од светот, гевгелиските гимназијалци со својот проект за наједноставен и најефикасен соларен колектор за топла вода, во првиот круг влегле меѓу избраните 100 проекти, а во финалната селекција стигнале до третото место. Ова претставува огромен успех за учениците и нивните ментори на натпреварот што се одржува во организација на Центарот за наука,техника и учење со седиште во Њу Џерси.
Градоначалникот Франгов на учениците Џотов и Раманчев им го честиташе големиот успех на меѓународен план и напомена дека со таков успех и самиот тој се гордее, учениците на најдобар начин ја афирмираат не само општина Гевгелија, туку и Република Македонија.
|