Промоција на книгата „Ова е ваше време“ од Десанка Николова во КочаниКочани, 26 мај 2016 (МИА) - Во организација на Здружението за наука и уметност „Стари поток“ од Кочани, синоќа во Основното училиште „Никола Карев“ пред голем број ученици и наставници беше промовирана најновата книга стихови за деца „Ова е ваше време“ од поетесата Десанка Николова, која живее и работи во Велес.
- Во оваа книга низ стихови многу колоритно и ненаметливо е опеан животот на детството. Низ шест циклуси стиховите се посветени на најмалите, за здравата храна, за месеците од годината, за училишните денови па се до првата ученичка љубов, истакна Лили Арсова поетеса од Велес, промотор на книгата.
Инаку ова е втор град каде што гостува хуманитарниот караван со оваа поетеса, кој во наредните денови ќе посети уште неколку градови во Македонија.
За Здружението за наука и уметност „Стари поток“ од Кочани ова е втора промоција на книга, а се најавува средба со роднокрајни автори од Кочани и Виница.
|