Претставата „Разговори во четири очи“ гостува на ФЕМАРТ во ПриштинаСкопје, 27 мај 2016 (МИА) - Македонскиот народен театар со претставата „Разговори во четири очи“ на 30 мај во Приштина ќе гостува на 4. Фестивал на жени уметници во борба за човечки права - ФЕМАРТ.
Претставата од Ингмар Бергман во режија на Нина Николиќ е копродукција на МНТ и Скопје филм студио и ќе биде изведена во Народниот театар во Приштина на затворањето на ФЕМАРТ кој почна на 25 мај.
- Оваа претстава се надоврзува на идејата на фестивалот за претставување и прикажување дела и активности од женски автори и изведувачи: режисери, драматурзи, актери, уметници, поетеси, музичари..., соопшти МНТ.
ФЕМАРТ е единствен женски фестивал во Косово и најголемиот во регионот, организиран од Артполис. Фестивалот прикажува оригинални и уметнички креации во повеќе категории: театар, документарни филмови, работилници, изложби, промоции на книги, концерти, поезија и други уметнички форми од уметници од Косово, регионот и од Европа.
Во шестдневната програма се триесетина целодневни активности со над 100 учесници на осум различни локации во Приштина.
|