Во ПТЦ Гевгелија престојуваат 139 бегалци

Гевгелија, 31 мај 2016 (МИА) - Во привремениот транзитен центар во Гевгелија се уште престојуваат 139 бегалци кои останаа по затворањето на балканската рута, а предприемниот шатор кој се наоѓа надвор од кругот на кампот е празен, информираа надлежните од регионалниот Центар за управување со кризи во Гевгелија.

Тоа значи, посочуваат, дека во изминатото деноноќие немало нелегални преминувања на границата со Грција затоа што таму се сместуваа бегалци кои преминуваа илегално на наша територија и по проверката беа враќани назад.

Целосно е испразнет и дивиот камп во Идомени по што осетно се релаксира состојбата на јужната гранична линија. Бегалците најблиску до нашата граница, јави дописникот на МИА, се уште може да се забележат на дваесетина километри во внатрешноста на Грција во провизорниот камп покрај автопатот кај Поликастро.

Во текот на вчерашниот ден од ПТЦ Гевгелија за Скопје биле пратени две родилки во приватната болница „Систина“.