Завршува реконструкцијата на здравствената станица во Двориште

Берово, 2 јуни 2017 (МИА) - Во завршна фаза е реконструкцијата на здравствената станица во беровското село Двориште која беше оштетена од поплавите во 2015 година.

Средствата за најзината реконструкција во висина од околу 30 илјади евра се обезбедени од програмата „Грант помош за поддршка на мали проекти“ основана од Владата на Јапонија.

Од Општина Берово информираат дека преку јапонската донација се обезбедени средства за поправка на покривот, реновирање на објектот, промена на прозорците и вратите, како и соодветен систем за дренажа кој во иднина ќе ја заштити здравствената станица од поголеми поплави.

Проектот за реновирање на здравствената станица во село Двориште е еден од петте проекти кои се реализираат во Македонија со донација од јапонската Влада во вкупна вредност од 300.000 евра.