Концерт на „Филип Шурбевски Езгија трио“ во КавадарциКавадарци, 23 јули 2016 (МИА) - Вокално-инструменталниот состав кој ја негува македонската традиционална чалгиска музика „Филип Шурбевски Езгија трио“ синоќа имаше целовечерен концерт во галеријата на Домот на културата „Иван Мазов-Климе“ во Кавадарци. Составот е формиран во 2011 година, а во Кавадарци настапуваше прв пат.
- Почнавме спонтано, сакавме да го зачуваме овој тип на музика, кој е во изумирање, а има убав звук, староградски, баш автентичен македонски, изјави Филип Шурбевски, кој свири на тарабука.
Виолинистот Ристе Апостолов, по потекло од Кавадарци, го изрази задоволството што настапуваат пред публиката во Кавадарци-град во кој, како што рече, се негува чалгиската музика.
Митко Наумовски-Џумбус нагласи дека со оглед на тоа што оваа музика е во изумирање, наидуваат на позитивни реакции кај луѓето кои се воодушевени од нивната одлука да ја продолжат традицијата на негување чалгиска музика.
„Филип Шурбевски Езгија трио“ има настапувано на бројни концерти во земјава и странство.
|