Пијанечки денови на сливата во ДелчевоДелчево, 12 септември 2016 (МИА) - Делчево се подготвува за 5. Денови на пијанечката слива кои по традиција се одржуваат во месец септември на крајот на бербата на сливите.
Советникот за ЛЕР од општина Делчево Тони Стоименовски, денеска ги повика производителите од регионот, училиштата, институциите, домаќинките, но и производителите на домашна сливова ракија, да се пријават во општината и да земат учество на јубилејните денови на пијанечката слива со цел да го збогатат настанот и да ги изложат своите специјалитети подготвени од сливи.
- Деновите на пијанечката слива ќе се одржат на 23 септември во попладневните часови. Ова е уникатна можност нашите домаќини да ги изложат своите специјалитети од слива. Посетителите ќе имаат можност и на лице место да видат како се вари слатко, мармалад од слива, но и како се вари ракија, бидјеќи знаеме дека во овој крај се вари добра сливова ракија, рече Стоименовски.
Тој додаде дека за годинава општина Делчево подготвува и парични награди за најдобрите производи.
- За прцо место предвидена е парична награда од 12 илјади денари, за второ 6 илјади денари, а за трето награда од три илјади денари. Комисија ќе ги оценува понудените специјалитети и се надеваме дека, како и секоја година, и оваа ќе има уникатни специјалитети, рече Стоименовски.
Освен штандовите, на летната сцена свои концерти ќе имаат и неколку културно-уметнички друштва од регионот, а за вечерта е најавен концерт на Наум Петрески и Зуица Лазова. Инаку Делчево, модрата слива ја смета за свој бренд, бидејќи е најзастапена овоштарска гранка која ја има на 700 хектари површина. Во добра земјоделска реколта само од Пијанец годишно на пазарот излегуваат над 2 илјади тони сливи.
|