На „Ало докторе“ изминатата недела имало 1.420 повици

Скопје, 26 септември 2016 (МИА) - На телефонската линија 02/15 123 за медицински совет „Ало докторе“ во изминатите седум дена (од 19 септември до 25 септември)  имало 1.420 повици. 

Од 15 септември 2014 година кога почна да работи линијата, досега, имало 115.120 повици. 

Линијата е достапна секој ден 24 часа со цел да се овозможи непосредна медицинска консултација во моментот на појава на какви било симптоми на нарушување на здравјето.

Дваесет и пет доктори се достапни за медицински совет за јавувањата кои се од граѓани од сите градови на Македонија.

Повиците се со широк спектар на најразлична симптоматологија, најчесто за кардиоваскуларни и респираторни симптоми, главоболки, зголемена телесна температура, стомачен вирус, алергиски реакции и симптомна болка.

На линијата „Ало докторе“ често се јавуваат граѓани за совети поврзани со терапијата која редовно ја примаат за хроничните болести и за симптоми поврзани со крвен притисок.

На сите оние кои побарале медицински совет на телефонската линија „Ало докторе“ им е дадена здравствена помош со совет и соодветна симптоматска терапија.