Изложба на графики на Дијана Томиќ Радевска

Скопје, 21 октомври 2016 (МИА) - Во галеријата „Борко Лазески“ во Центарот за култура „Марко Цепенков“ во Прилеп денеска ќе биде отворена изложба на Дијана Томиќ Радевска, која ќе се претстави со 60 графики.

Со отворањето на изложбата ќе профункционира новата ликовна галерија во Центарот за култура која името го доби по еден од основоположниците на македонското современо сликарство Борко Лазески, кој пред 20 години во Центарот насликал мурал.

Новата галерија има три галериски простори преку кои ќе се презентира ликовната уметност во Прилеп.  

Дијана Томиќ Радевска е родена во Скопје во 1961 година. Дипломирала во 1984 година на одделот графика на Факултетот за ликовни уметности во Скопје. Работи графика, инсталации, видео и дизајн. Член е и основач на групата Круг. Има свои самостојни изложби во Македонија и странство и добитник е на многу награди.