Претседателот на ДУИ Али Ахмети оствари средба со новоименуваниот амбасадор на Франција во Македонија, Кристијан Тимоние.
Како што соопшти ДУИ, Ахмети му честитал на амбасадорот за новата задача, изразувајќи уверување дека тесната соработка со официјален Париз ќе продолжи и во иднина.
Ахмети и Тимоние разговарале и околу политичката ситуација и изборите на 11 декември, како и интеграцијата на Македонија во НАТО и ЕУ.
На средбата Ахмети ги искажал ставовите на ДУИ за политичката ситуација велејќи дека секој треба да го даде својот придонес за веродостојни и сеопфатни избор.
Ахмети, како што е наведено во партиското соопштение, не верува дека може да има активности на штета на изборниот процес. Тој истакнал дека ДУИ е против секој обид за заплашување или условување на гласачите.
Во оваа пригода Ахмети ја истакнал потребата од француската поддршка за силно продолжување на Евроатлантската перспектива на Македонија.