Романот „Дваесет и првиот“ на шест арапски саеми на книгата

Скопје, 27 октомври 2016 (МИА) - Арапскиот превод на македонскиот роман „Дваесет и првиот“ од Томислав Османли во издание на „Ал Араби“ ќе учествува на шест арапски саеми на книгата и ќе биде претставен на фестивалите на книгата во Алжир, Обединетата Арапска Република, Саудиска Арабија, Судан, Кувајт, Египет и Мароко. 

Книгата е веќе испратена на Самот на книгата во Шарџа, Обединети Арапски Емирати, на манифестацијата „Салон ду Ливре“ која се одржува во Алжир, потоа на Картумскиот саем на книгата во Судан и на фестивалот на книгата во Кувајт, како и на Саемот на книгата во Џеда, Саудиска Арабија.

Според најавата на издавачот на арапскиот превод, „Дваесет и првиот“ ќе биде презентиран и на Каирскиот саем на книгата, како и на мароканскиот Саем на книгата во Казабланка.

По двете македонски изданија, овој роман на Османли досега беше објавен во Хрватска, Црна Гора, Србија, Русија и неодамна во Египет.

Покрај печатеното издание, книгата на македонскиот автор ќе има и свое електронско издание на арапски јазик, исто така под знакот на големиот египетски и арапски издавач „Ал Араби“.