Скопје, 26 ноември 2016 (МИА) - Носителот на кандидатската листа за пратеници во Изборната единица 2 Оливер Спасовски денеска во Ѓорче Петров го презентираше „Планот за живот во Македонија“ на коалицијата предводена од СДСМ.
- За да ја зајакнеме економијата, за да го спречиме иселувањето и за да го вратиме животот, во Планот за живот во Македонија предвидуваме низа мерки со кои ќе ги помогнеме домашните компании. Една од тие мерки е навремена исплата на обврските од државата. Ќе ги вратиме долговите кон домашните фирми. Во првите 100 дена јавно ќе објавиме план и јасни рокови за нивно плаќање, рече Спасовски.
Најави и помош за фирмите, 25 отсто од збирот на инвестицијата и бруто трошокот за нови работни места, поволни микрокредити за отворање мали компании со само еден процент камата за кредит до 15. 000 евра, како и намалување на трошоците за фирмарина за фирмите со помалку од 5 вработени.
- Ова се дел од мерките со кои ќе ги помогнеме домашните фирми зашто тие се двигател на целокупната економија. Нашата цел е да направиме посилни домашни компании за да имаме посилна економија, да направиме посреќни и послободни граѓани за да останат тука во Македонија, да продолжат тука да живеат и да создаваат семејства, потенцира Спасовски.