Договор за соработка на охридскиот Хидробиолошки завод и Музејот на езерото Бива во ЈапонијаОхрид, 16 јануари 2017 (МИА) – Договор за соработка утре ќе потпишат Хидробиолошкиот завод во Охрид и Музејот на езерото Бива од Јапонија, во насока на зајакнување на македонско – јапонската билатерална соработка во научната област, што ќе овозможи размена на научни искуства и заеднички проекти меѓу двете институции. Според соопштението од Хидробиолошкиот завод во Охрид, предвидено е соработката да се одвива на две нивоа и тоа во научно – истражувачката дејност и на ниво на музеи. Во делот на научно-истражувачката соработка ќе се вршат заеднички испитувања на ретки ендемски видови и старост на езерата (Охридското Езеро припаѓа меѓу најстарите и најголеми езера во Европа, а езерото Бива претставува најголемото слатководно езеро во Јапонија), додека во делот на музејската соработка предвидено е претставување на Охридското Езеро во Музејот на езерото Бива. За таа цел, во постојаната поставка во Музејот на езерото Бива ќе бидат изложени фотографии, историски артефакти или реплики поврзани со животот на мештаните како чунови, јадици, мрежи, и други историски предмети поврзани со Охридското Езеро. Договорот за соработка утре ќе го парафираат директорот на Хидробиолошкиот завод Елизабета Велјаноска Сарафилоска и директорот на Музејот на езерото Бива, Тори Шинохара.
|