Бочварски: Патиштата неисчистени од снегот поради погрешни политикиСкопје, 17 јануари 2017 (МИА) - СДСМ денеска обвини дека патиштата низ државата и градските улици не се исчистени од снегот, а причината за тоа, според нив, е застарената механизација и невложувањето во тековното и зимско одржување на патиштата. Претседателот на партиската Комисија за транспорт и врски Благој Бочварски посочи дека во Македонија се вложуваат најмалку средства, односно 3.300 евра по километар за тековно и зимско одржување на патиштата за разлика од Србија која троши 9.000 евра или Босна и Херцеговина каде се вложуваат 7.700 евра. - Институциите немаат соодветна механизација за да ги одржуваат патиштата во зимски услови. Снегот се расчистува со 100 проценти застарена механизација. Освен што се стари возилата, јавните претпријатија располагаат со многу мал број возила. Поради тоа ангажираат други приватни фирми, но и тие, според нашите информации што ги имаме, имаат стари и дотраени возила, рече Бочварски. Според него, поради неисчистените патишта има отсечени градови и села и семејства се оставени без храна.
|