Зголемен број интервенции поради замрзнати водоводни инсталации во КумановоКуманово, 17 јануари 2017 (МИА) - Поради замрзанти водомери, цевки, инсталации, екипите на ЈП „Водовод“ Куманово дневно интервенираат од 35 до 45 пати, информираше денеска директорот на претпријатието Горан Стојковски. Според Стојковски најчесто интервенираат во домаќинства каде што е непрописно поставена водоводно-инсталациона мрежа. - Поради ниските температури доаѓа до замрзнување на цели вертикали во станбените единици, по станови, кој што во основа не е под ингеренција на претпријатието, но се обидуваме да им излеземе во пресрет на граѓаните во рамки на наши можности, изјави Стојковски. ЈП „Водовод“ набави и две пумпи за испумпување од општинскиот кризен штаб со кои се исцрпува водата од поплавените подрумски простории. - Ја користам можноста да апелирам до граѓаните да не пуштаат вода по 24 часа дневно, нешто што граѓаните го прават како превенција од замрзнување, бидејќи се троши вода како во најтоплите месеци од годината, додаде Стојковски. Наспроти големата потрошувачка од 310 литри вода во секунда, сепак нема проблеми со водоснабдувањето. Стојковски нагласи дека редовно добиваат вода од водостопанство „Кумановско-Липковско поле“, додека на терен се дежурни екипи кои се во подготовка за да им помогнат на граѓаните, доколку имаат потреба од интервенции.
|