Скопје, 18 јануари 2017 (МИА) - Претседателот на СДСМ Зоран Заев денеска се сретна со амбасадарот на Франција во Македонија, Кристијан Тимоние.
- На средбата е изразена заедничка согласност дека Македонија е исправена пред вистинска шанса да зачекори кон светла и стабилна евроатлантска иднина во интерес на граѓаните доколку продолжат демократските процеси во државата, се вели во соопштението од СДСМ.
Заев, според соопштението, рекол дека мнозинството граѓани побарале промени на изборите и оти сега е важно нивната волја да се преточи во институциите.
- Нашите очекувања се дека граѓаните ќе добијат нова и одговорна влада како што одлучија на изборите. Новата влада на граѓаните ќе биде посветена на реформските приоритети од извештите на Прибе и на Европската комисија, затоа што граѓаните на Македонија цврсто се определени кон европските вредности. Промените во Македонија се почнати, сега е потребно да се продолжи по вистинскиот пат, за достоинствен и квалитетен живот за сите граѓани во Република Македонија, едно праведно и правично општетство на еднакви граѓани, рекол на средбата Заев, кој потенцирал и дека за натамошниот напредок на Македонија е важна поддршката од пријателска Франција и од останатите земји поддржувачи.