Скопје, 16 февруари 2017 (МИА) - Социјалдемократскиот сојуз на Македонија соопшти дека планира институциите во кои граѓаните го остваруваат своите права да работат во две смени, односно до 20 часот.
- Инситутициите кои имаат значителен обем на работа, а во кои граѓаните остваруваат клучни права ќе работат во две смени, односно до 20 часот за да можат навремено да ги обезбедат услугите за сите граѓани подеднакво. Со тоа ќе им овозможиме на граѓаните лесно, брзо и ефикасно да ги завршуваат своите обврски кон државата,, наведува СДСМ во денешното соопштение.
Двосменското работење на клучните институции, како што се вели во соопштението, ќе биде спроведено уште во првите шест месеци од мандатот.
Со ова, смета СДСМ, секој граѓанин навремено ќе ги завршува обврските, а вработените во законски утврденото работно време ќе можат да одговорат на своите работни обврски.