Меѓународен ден на мајчиниот јазик одбележан во Битола

Битола, 21 февруари 2017 (МИА) - Универзитетската библиотека „Св. Климент Охридски“-Битола во соработка со основните училишта „Коле Канински“, „Св. Кирил и Методиј“, „Ѓорѓи Сугарев“ и „Даме Груев“ го одбележаа 21 Февруари – Меѓународен ден на мајчиниот јазик.
Претставникот на библиотеката „Св.Климент Охридски-Битола Илче Стојановски потсети дека Меѓународниот ден на мајчиниот јазик е востановен од УНЕСКО на 30. сесија на Генералната конференција во 1999 година, а во 2000 година, 21 Февруари е промовиран како Ден на лингвистичката и културната разновидност и мултилингвизам.
- Јазикот е суштинскиот белег на идентитетот на секоја група или поединец, кој претставува хармонична поврзаност меѓу глобалното и локалното. Мајчиниот јазик е најголемата вредност за секоја нација. Јазиците се многу важни за постигнување на основните цели на образование за сите. Тоа е и исто многу важно и за промовирање на културната разновидност како и во борбата против неписменоста и во квалитетното образование кое вклучува предавања на мајчиниот јазик во почетните години на школувањето за секој да може да ги научи вредностите на својот јазик, кој го изразува идентитетот, рече Стојановски.
Во светот денес се зборуваат околу 6.500 јазици, но и многу јазици се исчезнати со што, како што рече, на еден начин тоа претставува бришење на идентитетот.
- Нашата земја е мала, но сепак имаме свој јазик кој го одразува нашиот идентитет во светот. Македонскиот јазик е сврзно ткиво за сите нас што живееме тука и тој не обединува да бидеме силна нација од луѓе што се разбираат меѓу себе, посочи Стојановски на свеченоста во Битола.