Во Виница промовирана книгата „Војни за природни стратегиски ресурси“ од Гоце Георгиев

Виница, 22 март 2017 (МИА) - Книгата „Војни за природни стратегиски ресурси“ од Гоце Георгиев денеска беше промовирана во Виница.
Промоторот на книгата Ѓорѓи Малковски рече дека во трудот „Војни за природни стратегиски ресурси“ се истакнува оти војните или воените интервенции се почнати поради геополитичките интереси на моќните земји - предводнички на капитал системот или предводници на т.н. нов светски поредок.
- Значењето на трудот е уште поголемо бидејќи е пишувано од автор кој обработувајќи ја својата докторска дисертација овие настани ги прикажал многу реално. Го отсликал стратегиското рамниште во подготовките за воените дејствија, за способност за донесување разумни и прифатливи заклучни констатации за основното значење на ресурсите во согласност со развојот, подготовката и употребата на вооружените сили, истакна Малковски.
Книгата „Војни за природни стратегиски ресурси“ е поделена на четири дела: „За војната“, „Ресурси“, „Нафтата како причина за конфликт“ и „Водата како причина за конфликт“, во кои е заокружена една целина со сите релевантни, суштински и логично поврзани настани за војните за ресурси на глобално ниво.
- Почнувајќи од првобитната заедница преку робовладетелството, феудализмот, капитализмот, можеме да заклучиме дека при водењето војни се заземаат територии, а на овие територии имало ресурси, како на пример робови, храна, вода, дрва, јаглен, нафта и сл. И војната водена во Македонија во 2001 исто така на еден начин претставува војна за ресурси, истакна Георгиев.
Книгата, чии издавачи се општина Виница и Организацијата на резервни офицери, е со тираж од 100 примероци.