Средба на претседателот на СДСМ Заев со босанската амбасадорка БабиќСкопје, 24 март 2017 (МИА) - Претседателот на СДСМ, Зоран Заев, денеска имаше средба со амбасадорката на Босна и Херцеговина во Македонија, Лепа Бабиќ, на која се разговарало за потребата од што побрза разврска на политичката криза во Македонија. - Очекуваме во понеделник да се избере новиот претседател на Собранието кој ќе го извести Ѓорге Иванов дека е должен веднаш да ми го даде мандатот за состав на новата реформска Влада, рекол Заев, соопшти СДСМ. На средбата се разговарало и за очекувањата на домашната јавност, граѓаните и бизнис секторот за стабилизација и развој на Македонија и за продлабочување на економската и културната соработка со Босна и Херцеговина. Заев истакнал дека Европската унија и НАТО ги поддржуваат демократските процеси во Македонија и отвораат врати за тие стратешки перспективи на земјата. - Имаме демократски обезбедено парламентарно мнозинство од 67 пратеници и Програма на новата реформска Влада за унитарна Македонија, посветена на потребите на граѓаните. Не смее никој да ги блокира институциите за лични цели и затскривање од одговорност за направени криминални дела, навел претседателот на СДСМ.
|