Атанасов: Новата влада ќе го укине екстерното тестирање Скопје, 24 март 2017 (МИА) - Претседателот на Комисијата за образование на СДСМ Петар Атанасов денеска на прес-конференција рече дека новата влада што ќе ја формира СДСМ на првата седница ќе го укине екстерното тестирање за учениците.
- Oвој јуни нема да биде најстресниот месец во годината за учениците, наставниците и родителите, рече Атанасов, оценувајќи го екстерното тестирање, како нелогично и дека не донело ништо добро за образованието освен притисоци врз учениците и казни за наставниците. Според Атанасов, СДСМ ќе обезбеди квалитет на образованието и крупни реформи за вистински, успешен, модерен и европски образовен модел. Ќе има, како што рече, помалку предмети, настава соодветна за возраста и потребите на младите, наставници ослободени од административни обврски, посветени на учениците. - Во основното образование, во првите пет години ќе има само описно оценување. Оценки ќе има во следните четири години. Бројот на ученици во паралелка ќе го намалиме на 25 ученици во просек. Во средното образование, покрај класичното четиригодишно гимназиско и стручно образование, ќе воведеме и можност за завршување по втора и трета година кај стручното образование, рече Атанасов.
|