Скопје, 25 март 2017 (МИА) - Сите политички партии и институции мора да им отворат пат на демократските процеси во Македонија, бидејки тоа е избор на граѓаните. На Македонија и е потребно брзо решение на политичката криза, соопшти СДСМ.
Домашната и меѓународната јавност, посочуваат од партијата, очекуваат државничко однесување од страна на Собранието на Република Македонија и од страна на институцијата претседател на државата, кои мора да овозможат составување нова Влада.
- Околу 700.000 граѓани избраа промени на кредибилни избори и на демократски начин составија парламентарно мнозинство од 67 пратеници и таа мнозинска волја на граѓаните е обврска за сите да се преточи во институциите на системот. Претседателот Заев кој ја доби нивната поддршка излезе со Програмата на новата реформска Влада, којашто ги гарантира унитарноста и суверенитетот на Македонија, и oбезбедува квалитетен живот на граѓаните, владеење на правото, социјална кохезија и евро-атлантска перспектива на државата, се вели во соопштението.
Од СДСМ потенцираат дека како сериозна партија ќе продолжат внимателно да ги движат демократските процеси.
- Низ институциите на системот ќе биде избран новиот претседател на Собранието и тој ќе го извести Ѓорге Иванов дека е должен веднаш да му го даде мандатот на претседателот Заев, за состав на новата Влада. Нема да дозволиме поединци вмешани во криминал да ја дестабилизираат Македонија и да ги вовлекуваат во опасност граѓаните и нивните семејства, стои во соопштението.