„Театар во Библиотека“ за Светскиот ден на театаротБитола, 27 март 2017 (МИА) - Националната установа универзитетска библиотека „Св.Климент Охридски“-Битола во рамки на празничните програми посветени на 72-та годишнина од формирањето на библиотеката, денес го одбележа и 27 март - Светски ден на театарот. За читателите и пријателите на библиотеката беше одиграна претставата „Театар во библиотека“, која ја подготвија младите актери од детското драмско студио „Арт и медиа“ – Битола. - Децата од драмското студио прикажаа интересни ситуации кој се случуваат во библиотеката на еден шеговит, но едукативен и креативен начин и испратија порака за подигање на свеста и културата на читање и користење на литература. По завршувањето на претставата се одржа интерактивна работилница на тема „Нацртај маскота на библиотеката“ во која учениците учесници презентираа различни ликовни прикази, идеи и предлози за изгледот на маскотата на библиотеката, истакна Фатма Бајрам Аземовска, стручен соработник во НУУБ „Св.Климент Охридски“-Битола. Свеченостите по повод 72-годишнината од формирањето на библиотеката во Битола продожуваат во четврток со промоција на проектот „Еко библиотека“. - Во реализацијата на проектот во НУУБ „Св. Климент Охридски“ Битола, ќе бидат вклучени сите основни училишта, учениците и наставниците кои го минале или се уште го минуваат процесот на имплементација на еколошките стандарди во своите средини. Тие ќе се појават како консултанти на библиотеката, кои ќе водат кон активности за подигање на еколошката свест кај поединците во подобрувања и заштеда во трошењето на ресурсите и зачувувањето на еколошката средина. Завршниот настан од програмата за одбележување на 72-от роденден на библиотеката и 83 годишнината од раѓањето на Борислав Талевски, ликовен уметник од Битола е закажан за 31. март кога во просториите на библиотеката ќе биде отворена на ликовна изложба „Ликовни одблесоци – сеќавање на творештвото на Борислав Талевски“.
|