Општина Карбинци со европски пари ќе го санира корито на Козјачка река

Штип, 12 април 2017 (МИА) - Коритото на Козјачка река која поминува низ селото Карбинци ќе се санира со европски пари, информираа на денешната заедничка прес-конференција градоначалникот на општина Карбинци Зоран Минов и претставници на бугарската општина Струмјани.
Минов нагласи дека преку Програмата за меѓугранична соработка меѓу Македонија и Бугарија, општините Карбинци и Струмјани добија заеднички проект за санирање на речните корита во општините. Општина Карбинци од Фондовите на ЕУ добива грант од 179.000 евра, а со санирањето на коритото на Козјачка река ќе се заштити населението од поплави.
Тој потенцира дека пред две години надојдените води од планината Плачковица направија голема штета на корито, а еден дел од патот беше и разрушен. Штети имаа и жителите и неколку фирми во селото Карбинци.
- Со релизација на овој проект ќе можеме да ја зголемиме безбедноста, да го уредиме речното корито и да направиме голем бенефит за самото село Карбинци, но и за нашата општина, рече Минов.
Проектот предвидува чистење долж течението на реката, отворање на постоечките каскади и изградба на регулирано речно корито со заштитни бетонски ѕидови долж 250 метри. Дополнителни 200.000 евра се наменети за регулирање на речното корито на Шашка река во општина Струмјани, Република Бугарија.