Министерот Тодоров во еднодневна посета на Унгарија

Скопје, 12 април 2017 (МИА) - Министерот за здравство Никола Тодоров во рамки на еднодневната посета на Република Унгарија, денеска оствари работна средба со министерот за човечки ресурси на Унгарија, Золтан Балог и неговиот тим.


Како што соопшти Министерството за здравство, на средбата било разговарано за продлабочување и зајакнување на билатералната соработка во повеќе аспекти од здравството, во насока на целокупно унапредување на квалитетот на здравствените услуги, особено преку доедукација и доусовршување на здравствениот кадар.


- Посебен фокус на средбата беше ставен на размена на искуства во делот на едукација на здравствените работници.

Се разговараше за унапредување на програмата за обуки на здравствениот кадар, како и за можноста за обезбедување стипендии за македонските студенти и доктори по медицина во реномирани установи во Унгарија, соопшти Министерството за здравство.
Тодоров и Балог разговарале и за можностите за соработка во областа на електронското здравство, а унгарскиот тим покажал интерес за функционирањето на националниот систем за електронско здравство „Мој термин“.