Скопје, 13 април 2017 (МИА) - СДСМ денеска преку соопштение посочува дека сите се должни да овозможат мирен трансфер на власта и оти во следниот период многу брзо граѓаните ќе добијат влада според Деловникот, Уставот и законите.
Во соопштението се наведува дека новата влада ќе се грижи за реалните потреби на граѓаните и за државните интереси.
- Работниците ќе добијат покачување на минималната плата на 12 илјади денари во првата година, а таа ќе порасне до 16 илјади денари на крајот на мандатот на новата реформска влада. Просечната плата ќе се качи до 500 евра. Ќе се намалат нивните животни трошоци. Граѓаните ќе плаќаат помалку пари за електрична енергија, бидејќи ќе се врати евтината дневна тарифа од два часа секој ден и преку целиот викенд и сабота и недела, се вели во соопштението и се додава дека ќе се укине екстерното тестирање и плаќањето на радиодифузната такса.
Во соопштението СДСМ наведува и дека државата ќе напредува кон ЕУ и НАТО.