СДСМ денеска во соопштение изрази почит за загинатите припадници на Министерството за внатрешни работи во оружената пресметка во кумановската „Дива населба“ на 9 мај 2015 година и порача дека случајот ќе биде расветлен на транспарентен, независен и професионален начин, со што, како што нагалсува, ќе се расчистат сите дилеми и шпекулации.
- Новата влада предводена од СДСМ, ќе се посвети на целосно расветлување на случајот и неговата позадина. Ќе биде побарана и меѓународна поддршка во истрагата заради обезбедување на сите релевантни информации, но и за обезбедување потполна доверба на граѓаните во резултатите од истрагата. Никој нема да биде амнестиран од одговорност, доколку се докаже дека на каков било начин бил дел од инцидентот што ја загрози безбеденоста на државата, се вели во соопштението.
Според СДСМ, вистината за случувањата од 9-ти мај 2015 година во Куманово е должност кон семејствата на осумтемина загинати бранители, кон семејствата кои останаа без домови и кон сите граѓани на Република Македонија.
- СДСМ изразува почит кон загинатите бранители и кон сите граѓани на Куманово и на Македонија кои не дозволија провокациите од каков и да е мотив, да ја нарушат стабилноста на државата, се вели во соопштението и се истакнува дека правдата мора да допре до извршителите, но и до иницијаторите и нарачателите на кумановските настани.