Скопје, 21 јули 2017 (МИА) - СДСМ во писмената реакција на денешната прес-конференција на Илија Димовски од ВМРО-ДПМНЕ нагласува дека договорот за добрососедство со Бугарија јасно ја реафирмира позицијата дека се работи за две посебни држави, два посебни народи и два посебни јазика.
- Со потпишувањето на Договорот, Македонија станува пример за соработка на Балканот, бидејќи ретки се државите во регионот кои отворените прашања ги решаваат заемно и по сопствена волја. Успехот од потпишувањето на Договорот е заеднички на сите граѓани и на сите досегашни влади, бидејќи ќе се финализираат преговорите што се започнати во 2009 година.
Владата предводена од СДСМ води политика на пријателство и соработка и ги решава сите отворени прашања на Република Македонија како на надворешен така и на внатрешен план и затоа од особена важност е ВМРО-ДПМНЕ да учествува во заедничкиот успех и да даде поддршка на овој Договор, се вели во реакцијата.
Притоа се посочува дека 11 години ВМРО-ДПМНЕ ја изолирала Македонија и ја нарушувала нејзината меѓународна позиција, додека новата Влада ја зајакнува позицијата на Македонија и ги отвора нејзините евроатлански перспективи.