Арсовски: Продолжува партизацијата на институциитеСкопје, 27 јули 2017 (МИА) - ВМРО-ДПМНЕ денеска го обвини СДСМ дека продолжува да ги полни институциите со партиски кадри и оти тоа го прави со кршење на законот. Димче Арсовски, потпретседател на УМС на ВМРО-ДПМНЕ денеска пред Министерството за економија изјави дека според информациите од медиумите во ова Министерство за државен секретар бил поставен Зоран Павловски од позицијата раководител на сектор за администрирање на приходи, локален економски развој и стратешко планирање во Општина Куманово, а не од вработените во Министерството, со што, вели, бил прекршен законот за административни службеници. Потсети и на ист ваков случај од пред неколку дена во Министерството за здравство каде бил именуван за државен секретар Владимир Милошев претходно вработен во клиничката болница во Штип - Ова преставува класично непочитување на законите и за тоа некој еден ден ќе сноси санкција. Ова е класично рушење на институциите во Македонија. Да биде иронијата поголема денес случајот со именувањето на државниот секретар во Економија се врши пред носот на Агенцијата за државни службеници. Тие со министерството за економија делат еден ист објект, ама абер немаат да реагираат на ваквите груби кршења на законот со што се загрозува функционирањето на администрацијата. Според него, ова не е само партизирање на институциите, туку, и рушење на системот преку непочитување на законските одредби“. - Со овие кадровски решенија СДС го доведува во прашање нормалното функционирање на администрацијата во министерствата и спроведувањето на нивната основна должност да бидат сервис на граѓаните и да одговараат на нивните потреби и барања, вели Арсовски и најави одговорност за сите вакви незаконски однесувања и кршење на законите.
|