Давчевски: Град Скопје да не го финансира Панорамското тркалоСкопје, 16 август 2017 (МИА) - Советничката група на СДСМ и коалицијата во Совет на Град Скопје се спротивставува на обидот на градската власт да го продолжи финансирањето на Панорамското тркало кое го гради ЈСП Скопје. Ова денеска го изјави Драги Давчевски, координатор на советничка група на СДСМ и коалицијата во Совет на Град Скопје. - Во услови кога буџетот на Град Скопје за период од првите шест месеци има остварување под 30 отсто со ребалансот се зголемуваат средствата за оваа непродуктивна градба. Тоа се прави преку моделот за субвенции кои се даваат како парични средства на ЈСП Скопје за т.н. потешкотии во работењето, а всушност се работи за покривање на трошоците од градбата на Панорамското тркало, нагласи Давчевски. На овој начин, како што рече, ЈСП Скопје ќе добие субвенции од 3,5 милиони евра, не за санкционирање на потешкотиите во јавниот превоз, туку за Панорамското тркало за кое имавме разумен предлог за негово стопирање и конзервирање. - Откако по промената на централната власт беа прекинати донациите од државните институции за тркалото, се премина на форма со субвенции од Град Скопје. Ова е уште еден доказ од многуте во изминатиов период кои сведочат за расипничко трошење на народни пари за градби кои не се приоритет за граѓаните на Скопје, рече Давчевски.
|