Скопје, 23 септември 2017 - Под мотото “Ченто, чисто ти ќе бидеш”, во сабота, 23 септември 2017, жителите на населбата Ченто и одговорните соседи ќе мрдаат со прст и ќе се погрижат овој дел од градот да блесне во полн сјај.
Акцијата за разубавување на Ченто ќе започне точно на пладне, во областа кај зградите кај последната автобуска станица на автобуската линија 45.
Суштината на граѓанската иницијатива “Мрдни со Прст” е да предизвика акција за активно вклучување на поединците, здруженијата и компаниите и да го потенцира нивниот индивидуален придонес кон остварување на големи резултати од општествен интерес.
Ова саботно чистење околу зградите во Ченто на последна 45ка го иницираше Анета, жителка од Ченто инспирирана од успешно реализираната акција за чистење и разубавување во општина Аеродром во јули годинава. Анета е еден од главните иницијатори и мрдачи со прст која ја презема организацијата и реализацијата на овој настан и заедно со своите соседи ќе се погрижи своето маало да го претвори во поубаво место за живеење за сите.
Како дополнително разубавување на просторот и потсетник за одржување на чиста околина ќе остане уметноста на графит артистот Драш, кој оваа акција ќе ја преслика на една од зградите во околината. Ако ни се приклучите во акцијата, ќе имате можност да се дружите со водителот Марко Новески и дел од жителите на Ченто.
Повеќе информации за иницијативата Мрдни со Прст се достапни на www.mrdnisoprst.mk и Фејсбук страницата https://www.facebook.com/MrdniSoPrst/
Мрдни со прст! Ти си на потег!