ЛИ2017/Шилегов: Ефикасно ќе работиме за сите, ќе се грижиме за ранливите категории граѓаниСкопје, 5 октомври 2017 (МИА) - По победата на 15 октомври, Скопје повторно ќе стане Град на хуманитарноста. Хуманитарноста ја враќаме како еден од нашите врвни приоритети, вети кандидатот за градоначалник на Скопје од редовите на СДСМ и Коалицијата за живот, Петре Шилегов. - За разлика од досега, ранливите категории на граѓани, а наши сограѓани, лицата со посебни потреби кои што беа ставени на маргините на општеството, ќе бидат во еден од приоритетите за нивно вклучување во системот за обезбедување на можности за квалитетен живот, нормално секојдневие и ефикасно функционирање. Во тој контекст, секоја следна градска политика, инвестиција, секој тротоар и плоштад, лифт или зграда, кои што се под надлежност на градот и на општините составен дел од градот, мора да бидат инклузивни и за оваа категорија на граѓани, изјави Шилегов по посетата на општина Аеродром. Тој нагласи дека земаат обврска секоја институција, јавен и урбан простор да го направат пристапен за секој до крајот на неговиот мандат, како и обезбедување дефектолог во секое училиште што ќе овозможи грижа за оваа категорија на лица. - Градот на солидарноста не ги заборава луѓето од улиците. Градиме преноќувалиште за бездомници, со што ќе обезбедиме покрив над глава за секого во ладните скопски ноќи, и ќе нудиме и бесплатни оброци, основна здравствена хигиена. Новата градска администрација ќе обезбеди ефикасен пристап до европските средства, кои што досега целосно беа занемарувани. Преку нив ќе работиме на системска поддршка на бездомниците и на сите категории граѓани на кои што тоа им е неопходно, вети Шилегов.
|