Денеска имавме уште една раздвоена постапка, бидејќи уште еден од обвинетите од случајот на СЈО „Насилство во Центар“, си ја призна вината за кривичното дело што му се става на товар, изјави денеска специјалната обвинителка Фатиме Фетаи, по завршувањето на главната расправа за случајот.
Фетаи рече дека судот утре ќе ја објави одлуката за кривичната санкција и оти очекуваат иста пресуда како во случајот со Томислав Лазаров.
- Дадовме и завршни зборови и утре треба да биде објавена пресудата, истакна Фетаи.
По однос на останатите обвинети, истакна дека главната расправа ќе продолжи на 7 декември, бидејќи еден од адвокатите на тројца обвинети во овој предмет бил оправдано отсутен, а за да му се овозможи на секој обвинет неговото основно право да има бранител во постапката, прифатиле да се одложи главната расправа.
Денеска во Кривичниот суд-Скопје почна и заврши главната расправа во судскиот процес против Јордан Ристевски, петообвинет во предметот на СЈО „Насилство во Центар“, кој на денешното рочиште самоиницијативно призна вина.
Обвинетиот Ристевски денеска одеднаш ја призна вината и пред судијата и обвинителите од СЈО одлучи да се застапува сам, без помош од адвокат.
Тој рече и дека немал никакви притисоци, ниту закани, за да ја признае вината.
Неговиот досегашен бранител Боро Ристевски, го откажа полномоштвото за застапување, бидејќи, како што кажа, и самиот е изненаден од признанието на вина на неговиот клиент.
- По минатото рочиште откако ги разгледав делата за кои сум обвинет, сакам да кажам дека го признавам стореното и чувствувам длабоко каење, рече Ристевски во судницата.
Претходно, како што МИА објави, обвинителката Фатиме Фетаи побара постапката за него да се раздвои и судењето за него да продолжи веднаш.
Вина за настаните пред општина Центар во јуни 2013, претходно призна и четвртообвинетиот Томислав Лазаров, кој во раздвоена постапка доби условна шестмесечна казна, доколку во рок од две години не стори друго кривично дело.
На денешното рочиште присуствуваше и лидерот на ВМРО-ДПМНЕ Никола Груевски, кој е обвинет во предметот, а на излегување од судницата изјави дека не се чувствува виновен за обвинението и дека не се плаши од никаква санкција.