Повеќе од 600 лица, сторители или жртви на семејно насилство во изминатите четири години од функционирањето побарале и добиле поддршка од Првиот семеен центар на Град Скопје.
Изминатата година е зголемен бројот на лица кои добиле помош од стручни лица во Центарот.
- Најголем број од нив, 82 се жени жртви на семејно насилство, 28 се сторители на семејно насилство, а 41 малолетни лица кое биле директно или индиректно изложени на семејно насилство. Исто така, вклучени биле и 39 други членови на семејството за да помогнат во процесот на поддршка на малолетните деца или на жртвите на семејно насилство, рече Фросина Ивановска менаџер на семејниот центар.
Тој функционира во рамки на проектот Советувалиште за превенција на злоупотреба на дроги и семејно насилство, а е финансиски поддржан од Градот Скопје.
- Во буџетот за 2018 година Градот Скопје ги зголемува средствата за поддршка од 700 илјади на 1,5 милиони денари. Вложуваме максимални напори да ги зголемиме ефектите од превенција на дроги и семејно насилство, а со тоа подаваме рака на ранливите категории граѓани, рече градоначалникот на Град Скопје Петре Шилегов.
Семениот центар е единствено бесплатно советувалиште за сторителите на насилство со кои се работи врз основа на специјализирана програма за третман.