Мајка (50) и нејзиниот седумнаесетгодишен син загинаа во пожар што се случи рано изутрината во семејна куќа во Битола.
Причина за пожарот, според првичните сознанија на битолските пожарникари, е старата електрична инсталација на куќата што се наоѓа на ул. „Девејани“ бр. 115.
Екипа на Основното јавно обвинителство – Битола, МВР и Противпожарната служба вршат увид на местото на настанот. Надлежниот јавен обвинител издаде наредби за фотографирање и обезбедување на местото на настанот, како и за вршење на сите потребни вештачења во насока на утврдување на причините за пожарот. Издадена е наредба за обдукција на пронајдените тела и се преземаат други дејствија неопходни за расветлување на случајот.
Костадин Поповски, командир на Територијалната противпожарна единица – Битола, изјави дека пожарот бил пријавен утрото во 4 часот и 5 минути. Веднаш е испратена екипа со пет пожарникари и две противпожарни возила, но кога стигнале пожарот веќе бил во развиена фаза и ја зафатил кровната конструкција.
Поповски апелира до граѓаните да внимаваат во ноќниот период во своите домови да не оставаат отворен оган.