Унгарскиот портал 444.ху објави видео снимка од поранешниот македонскиот премиер Никола Груевски, кој се наоѓа во бегство во Унгарија, како се шета во трговски центар во Будимпешта.
Порталот пишува дека Груевски, кој со помош на унгарски дипломати пребегна во Будимпешта каде експресно доби политички азил поради загрозена безбедност, не изгледал како да е во опасност кога во саботата вечер налетал на еден од нивните читатели.
– Во речиси празен трговски центар и затворени продавници, се шета спокојно. Да, со големи гради се чувствуваш целосно безбеден, пишува порталот 444.ху, пренесувајќи го коментарот на авторот на видеото.
Груевски побегна во Будимпешта во ноември минатата година, и го избегна одржувањето на затворската казна од две години колку што беше осуден во случајот „Тенк“.