Издадени 16 забрани за работа на градилишта поради директна изложеност на работници на сонцеСкопје, 25 јули (МИА) - Државниот инспекторат за труд издаде 16 забрани за работа на позиции на градилишта поради директна изложеност на работниците на сонце.
Решенија за забрана за работа е издадена за градилишта на фирмите „Металец“ од Прилеп, „Градба Промет“-Скопје, „Маврово Инженеринг“-Скопје, „Прототип“-Скопје, „Бетон“-Штип, „Ферт Атомик“-Куманово, „Жикол“-Скопје, „Дабар“-Скопје, „Бетон“-Скопје, „Универзал градба“-Скопје, Фабрика „Карпош“-Скопје, ИГМ и ЦРТ од Скопје.
Градилиштата каде се најдени работници кои биле директно изложени на сонце се на улиците „Скупи“ бб, „Максим Горки“ до Грација, „9-ти Мај“ број 26, „Орце Николов“, „Дрезденска“ бб, „Загребска“ бб, „Илинденска“ бб, како и спортската сала „Борис Трајковски“, објектот ЗЕЛС на улица „Копенхагенска“ бб и во селото Визбегово.
Контролите се извршени во периодот од 23-25 јули при што инспекторите за заштита при работа извршиле вкупно 51 надзор во градежни фирми.
Од Министерството за труд и социјална политика информираат дека една забрана за работа е изречена и на градежната фирма ТЕХ-КОМ од Оризари-Кочани поради непријавување на почеток на градба.
|