Владата најавува изградба на карго аеродром во Штип

Штип, 21 јануари (МИА) - На аеродромот Сушево ќе се гради карго аеродром, најави денеска премиерот Никола Груевски по посетата на училиштето во подрачната единица Три чешми кај Штип.

- За три години во карго аеродромот треба да се инвестираат 60 милиони евра. Планирана е изградба на писта долга 2.400 метри со можност за проширување до 3.000 метри. Карго аеродромот ќе биде алтернатива на Скопскиот аеродром, а за околу 20 години може да стане и цивилен аеродром, рече Груевски.

Според него, кон крајот на февруари и почетокот на март ќе се распише меѓународен тендер за аеродромите во Македонија. Услов за идните концесионери ќе биде да ги реновираат аеродромите во Скопје и Охрид, како и да изградат карго аеродром во Штип.

Груевски додека дека истовремено со карго аеродромот ќе се гради и технолошка развојна зона од населбата Три чешми до Царинската испостава, распространета на 197 хектари земјиште.

Владата ќе почне со нивилирање на земјиштето, изградба на потребната инфраструктура и изградба на хали во кои идните инвеститори веднаш ќе можат да стартуваат со своето производство.

Со цел да се подобри и патната инфраструктура што ќе оди во прилог на развојот на Источна Македонија, се планира и изградба на автопатот Свети Николе - Миладиновци до 2014 година.