Издадена монографија за гевгелискиот комита Петар КаркалашевГевгелија, 21 април (МИА) - Интересна, историска и поткрепена со записи и преданија е новата монографија посветена на гевгелискиот револуционер Петар Д. Каркалашев (1874-1905) која излезе од печат во авторство на неговиот внук Ѓорги Каркалашев - пензиониран професор по историја и публицист.
Делото според зборовите на авторот има цел „не да направи мит за комитата и четник Петар, кој со својот татко Дељо по иницијатива на Гоце Делчев го формира месниот комитет на ВМРО во Богданци 1895 година, туку да му се оддолжи семејно и национално за неговото револуцинерно дело“.
Во текот на создавањето на монографијата авторот користел материјали од Архивот на Република Македонија и Централниот државен архив во Софија. Вратите му биле затворени пред Македонскиот национален институт во Софија со зборовите „Ти сакаш од бугарски херој да направиш Македонец!?“. Поради тоа делото е осиромашено со бугарското присвојување на револуционерните активности на гевгелискиот комита, кој во еден период од животот се образувал во Софија. Своите напредни идеи за македонската самобитност ги стекнал за време на школувањето во Солун, а потоа во Белград.
По ѕверското убиство на неговиот постар брат Иван на 19 години заминал во четата на гевгелискиот војвода Сава Михајлов, станувајќи подоцна негов секретар.
Животот го положил во борба со турскиот аскер, заедно со Савата, во местото Смоил, ениџе-вардарско, денешна Грција кога останувајќи без муниција си го одзеле животот и заедно умреле прегрнати.
Монографијата е издадена по повод 100-годишнината од неговата смрт, како белег на неговиот револуционерен живот и дело, зошто на местото на битката каде што е погребан во Смоил денес не постои негов гроб.
|