|
 |
Вести / Македонија
|
|
MНР упати протестна нота заради запирањето возила и физички напади врз македонски граѓани во Република Грција
12 мај
Министерството за надворешни работи на Република Македонија, информира дека по повод зачестените запирања на возила и физички напади врз македонски државјани во Република Грција, денеска беше повикан шефот на грчката Канцеларија за врски во Република Македонија Александра Пападопулу, при што и беше врачена протестна нота.
Во нотата се наведува дека во изминатите неколку денови се пријавени три поединечни случаи на насилно сопирање, малтретирање и навредување на македонски државјани во Република Грција, како и оштетување на нивните возила од непознати лица. Според нивните сведочења, возачите на товарни возила со македонски регистарски таблички биле сопрени и нападнати, во два случаи во близина на градот Лариса, односно на автопатот Кавала – Солун. Притоа, загрижува што едниот инцидент се случил во присуство на две возила на грчката полиција, која не презела никакви мерки да го спречи актот на насилство.
Министерството за надворешни работи на Република Македонија укажува дека со ваквите вандалски чинови, не само што се попречува слободата на движење на лица и стоки, што е една од фундаменталните вредности и принципи на Европската унија, туку и најдиректно се загрозува безбедноста и физичкиот интегритет на македонските државјани, што од своја страна, не придонесува за градење на добрососедски односи и доверба меѓу народите.
Со оглед на зачестеноста на инцидентите кои попримаат загрижувачка димензија, Министерството за надворешни работи на Република Македонија, очекува од надлежните грчки органи итно да преземат соодветни мерки, со цел спречување на слични насилства по патиштата во Република Грција.
Министерството за надворешни работи
_________________________________________________________________________________
МИА овие текстови ги објавува во интегрална и оригинална форма и не е одговарна за нивната содржина, ниту за евентуалните правописни недоследности или печатни грешки.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|