IDIVIDI

среда, 14.05.2008

IDIVIDI Мени

Вести / Македонија

Поднесени кривични пријави против две лица за инцидент во Раковец

Скопје, 13 мај (МИА) - Министерството за внатрешни работи вечерва поднесе кривична пријава против 28-годишно лице од село Раковец, осомничен за кривично дело предизвикување општа опасност и против 31-годишно лице од Голема Речица, осомничен за соучесништво во истото дело, информираше на прес-конференција министерката Гордана Јанкулоска.

Таа посочи дека синоќа, околу 21 часот, во населбата Блок 77 во Тетово од слобода беше лишено лице поради сознанија дека попладнето било инолвирано во инцидентот во селото Раковец. Очевидци го идентификувале приведениот во полицијата и потврдиле дека учествувал во настанот.

- Утврдено е дека тој не бил директен извршител и не пукал во возилата, туку вчера околу 16 часот заедно со првопријавениот со „форд мондео“ без регистерски ознаки пристигнале во Раковец каде што ДУИ во ресторан, во центарот на селото, одржувала средба со жителите. Со намера да го спречи собирот првопријавениот извадил автоматско оружје и им се заканувал да го прекинат собирот и да го напуштат селото. По вербалните закани, испукал повеќе куршуми кон паркираните возила во непосредна близина на местото на собирот, соопшти Јанкулоска.

Од престрелката биле оштетени шест возила, кои во тој моментот биле празни. Четири од возилата им припаѓале на функционери на ДУИ. По инцидентот, како што информираше Јанкулоска, двајцата го напуштиле местото на настанаот и се упатиле кон Тетово. Увидна екипа на СВР Тетово на теренот пронашла чаури кои се предадени на вештачење.

Против првопријавениот е распишана интерна потрага, а второпријавениот ќе биде изнесен пред надлежниот суд. Првопријавениот досега бил пријавуван и осуден е за недозволена трговија со оружје, а второпријавениот - за сторено кривично дело грабнување.