Катастарот за лозови насади ќе биде готов до крајот на годината, најавува министерот Спасеноски
Скопје, 14 мај (МИА) - Евиденција на производниот потенцијал, потврда за географското потекло и спроведување контроли, се клучните цели на Националниот регистар за лозови насади што треба да биде воспоставен до крајот на годинава.
Пред еден месец, со отворањето пет нови канцеларии во Неготино, Свети Николе, Охрид, Валандово и Скопје, почна втората фаза од овој меѓународен проект, вредна 474,8 илјади евра.
Лозовиот катастар ќе овозможи увид во површините под лозја, сопственоста, сортите грозје и нивната старост.
- Катастарската мапа која се исцртува компјутерски, ги опфаќа сите поголеми лозарски региони. Точно се знае големината на површините, сортата на грозјето, висината на производството и залихите, рече министерот за земјоделство, шумарство и водостопанство Ацо Спасеноски на денешната средба со новинарите.
Согласно Законот за вино, сите лозари во Македонија мора да се регистрираат.
- Првичната регистрација треба да заврши до крајот на годинава и практично ќе значи воспоставување на основниот систем за евиденција. Нови податоци постојано ќе се внесуваат. Производителите се должни, преку подрачните единици на Министерството, да ги пријавуваат површините, продукцијата и залихите, истакува Трајче Андреевски, правен советник на проектот.
Андреевски нагласува дека катастарот на лозја, не само што го следи производниот потенцијал, туку подразбира и предност при добивањето субвенции, како и услов за искористување на средствата од европските претпристапни фондови.
Според него, досега, иако немаше правна основа, одѕивот на земјодлците за пријавување на лозовите површини бил прилично голем.
Проектот за изготвување национален регистар на лозови насади почна пробно во 2004 година преку отворање канцеларија во Кавадарци со поддршка на Европската агенција за реконструкција. Во 2006 се набави потребниот софтвер и се направија потребните измени во законодавството согласно ЕУ препораките. Тогаш беа потрошени 1,2 милиони евра.
|