|
 |
Вести / Македонија
Од 120 пратеници анкетен лист за престанок на функцијата доставиле 91 пратеник (ДПЛ)
Скопје, 16 мај (МИА) - Од 120-те пратеници досега до Државната комисија за спречување на корупцијата анкетен лист за престанок на функцијата доставиле 91 пратеник, информира денеска на прес-конференција претседателката на Комисијата Мирјана Димовска.
Од оние кои доставиле анкетен лист, 67 се наоѓаат на кандидатските листи за идни пратеници во македонското Собрание. На листите се и 20 од останатите 29 пратеника кои не доставиле анкетен лист.
Димовска рече дека во 2006 година прекршочни постапки по основ на недавање на анкетен лист за престанок на функцијата се поведени против 10 пратеника и по поведувањето на постапката девет од нив го доставиле анкетниот лист.
Антикорупциската комисија, како што информираше Димовска, разгледала 36 конкретни случаи на располагање со државните добра, вработувањата и јавните набавки во време на избори.
Во врска со написите во некои медиуми дека Владата има усвоено акционен план кој предвидува вработување на 5.000 лица во државната администрација, Димовска рече дека е побарано од Владата комплетна информација околу овие вработувања. По добиениот одговор, како што рече Димовска, се чека само уште одговор на прашањето дали рокот на реализација на оваа задача е токму во овој период.
Димовска за наводите во дневните весници за отворање на владина кампања „Во каква Македонија сакаш да живееш-од тебе зависи“ рече дека е побарана информација од Владата, но оти досега нема одговор.
Во врска со информациите во некои медиуми оти Министерството за здравство има распишано огласи за нови вработувања по 12 април годинава, Комисијата го известила Министерството дека ваквите огласи треба да не се распишуваат, односно доколку се распишани по нив да не се постапува.
Побарана е комплетна информација од Министерството за култура за наводите дека во Министерството има предизборни вработувања. - Излезе дека се работи за преземања на веќе засновани работни односи и на незначителен број. Соопштен е ставот да не се распишуваат нови огласи, а постапката по веќе распишани огласи не смее да се продолжи, рече Димовска.
Антикорупциската комисија го известила и јавното претпријатие „Охридски комуналец“ дека треба да се запре какво и да е постапување по огласот за засновање на работен однос на определено работно време за 70 лица.
Димовска информира дека денеска треба да се преслуша и оргиналната снимка од изјавата на директорот за стратешко планирање Џонсон Мети, Колин Џефри кој завчера на презентацијата на динамиката за изградба на фабриката рече дека Џонсон Мети не е политичка организација така што за секој случај даваат донации за сите политички партии.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|