|
 |
Вести / Македонија
СРД им изрече мерки на неколку телевизии за прекршувања на правилата за известување во текот на изборната кампања
Скопје, 16 мај (МИА) - Советот за радиодифузија (СРД), на денешната седница, им изрече мерки на неколку национални, регионални и локални телевизии за прекршувања на правилата за известување во текот на изборната кампања.
Како што известуваат од СРД, според мониторингот на дел од медиумите, во првите денови од кампањата, се констатирани повеќе прекршувања на Упатството за медиумско претставување за предвремените избори, како и на Законот за радиодифузната дејност.
Најмногу прекршувања на одредбата од Упатството со која на медиумите им се забранува да емитуваат платени огласи и реклами со кои се промовираат резултатите и активностите на органите на власта и на други државни и јавни институции, се констатирани кај Програмата на албански јазик на Македонската телевизија. Истото прекршување е констатирано и од страна на Првата програма на МТВ, како и кај комерцијалните телевизии Телма, Скај Нет и МТМ, за што им е упатено укажување.
Програмата на албански јазик на Јавниот радиодифузен сервис доби укажување и затоа што нејзин новинар активно работи и на вести и како организатор на изборна кампања на политичка партија. МТВ2 доби и опомена за прекршување на законската одредба според која на Јавниот радиодифузен сервис му се забранува да емитува платена политичка програма.
Мониторингот од првите денови на изборната кампања утврди и прекршувања во врска со лимитите за платено политичко рекламирање. На Канал 5, Телма и на ТВ Арт од Тетово им се изречени опомени поради прекршување на законскиот лимит од 12 минути за емитување платено политичко рекламирање на еден час. Телевизиите А1, Канал 5, Телма и Сител ја прекршија и одредбата од Упатството со која на еден учесник во изборната кампања може да му се додели најмногу осум, од вкупните 12 минути, рекламно време за платена политичка програма во реален час.
Кај дел од медиумите констатирано е појавување на деца во рекламните спотови и извештаите од активностите на организаторите на изборна кампања. Советот укажува дека учеството на малолетници во политичко рекламирање е забрането со закон и апелира до медиумите да одбијат да емитуваат рекламирање во кое се злоупотребуваат малолетници.
Советот за радиодифузија ги мониторира сите електронски медиуми во државата, за време на изборната кампања, е во постојано заседание и секојдневно ќе изрекува соодветни мерки за прекршувањата на Упатствата и Законот за радиодифузната дејност.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|