|
 |
Вести / Македонија
На самиот почеток на седницата Собранието на получасовна пауза
Скопје, 4 јули (МИА) - Пред почетокот на денешната четврта седница Парламентот требаше да го констатира престанокот на мандатот на Никола Груевски, Гордана Јанкуловска, Трајко Славески, Миле Јанакиески и Зоран Ставревски откако тие поднесоа писмени оставки дека се откажуваат од пратеничката функција заради тоа што во исто време сеуште се членови на Владата.
Престанокот на нивниот мандат не беше констатиран бидејќи Јани Макрадули од СДСМ забележа дека согласно членот 65 од Уставот на Република Македонија, пратениците оставките треба да ги достават лично на собраниска седница.
На ова реплицираше претседателот на Парламентот Трајко Велјановски, според кого, посочениот член не значи дека пратениците лично треба да бидат присутни на седницата, туку дека оставките можат да ги достават во писмена форма до Собранието, додавајќи дека и до сега поднесувањето на оставки на функциите се правело на ист начин.
- Јас не зборувам каква била праксата досега, туку сакам да посочам што вели уставната одредба и дека вие на ваков начин го кршите Уставот, рече Макрадули и побара половина час пауза со цел, како што рече, претседателот на Собранието да размисли и да создаде услови оставките да се поднесат согласно Уставот.
Собранието на Република Македонија денеска треба да ја одржи четвртата седница на чиј дневен ред се закони за усогласување на македонското со европското законодавство.
Според предложениот дневен ред, седницата треба да почне со расправа по Предлог одлуката за изменување на Одлуката за основање Совет на Собранискиот канал. Потоа пратениците, меѓу другото, треба да ги разгледаат предлозите за донесување по итна постапка закон за изменување и дополнување на Законот за облигационите односи, законите за постапување по претставки и предлози, за задолжителни резерви на нафта и нафтени деривати, за изменување и дополнување на Законот за семејство, закон за облигационите и стварноправните односи во воздушниот сообраќај...сите со предлог закони и од ЕУ агендата.
Македонските парламентарци треба да расправаат и по предлозите за донесување по итна постапка закон за задолжување на Република Македонија кај Банката за развој при Советот на Европа по Рамковен договор за заем за делумно финансирање на „Проектот за изградба на фискултурни сали“. Пред пратениците се и законот за задолжување на Република Македонија со заем кај Меѓународната банка за обнова и развој - Светската банка по Договорот за заем по Проектот за подобрување на постоечката регионална и локална патна мрежа, како и законите за изменување на Законот за градежни производи и на Законот за минерални суровини... сите со предлог закони.
|
|
|
|
|
|
 |
Пребарување
|
|
|
|
|
|
|
IDIVIDI Речник
|
|
|
|
| Powered by MagnumPRO |
|
|
|